உங்களால் எங்களை
ஏதும் செய்ய இயலாதென்று சொல்லுமளவு
உங்கள் பலமறியாதவர்களல்ல நாங்கள்
கைகளில் பலமும்
உங்களுக்கு இருக்கிறது
எங்கள் அலுவலகத்தை
இடிக்குமளவு
எல்லாமிருக்கிறது உங்களிடம்
எங்களை வெட்டுமளவு பலமிருக்கிறது
உங்கள் அரிவாளுக்கு
ஒரே வெட்டில்
எங்களைச் சாய்க்குமளவு பலமிருக்கிறது
உங்கள் கைகளுக்கு
ஆனால்
நிலாச் சோறூட்டி
நீங்கள் வளர்த்த உங்கள் குழந்தைகளை
ஈ எறும்பு கடிக்காமல்
நீங்கள் காப்பாற்றிய உங்கள் குழந்தைகளை
நோய் நொடிகளிலிருந்து
நீங்கள் காப்பாற்றிய உங்கள் குழந்தைகளை
எங்கள் உயிர் கொடுத்தும்
உங்களிடமிருந்து காப்பாற்றுவதற்கான
எங்களது போராட்டத்தைச் சாய்க்க
உங்கள் கத்திகளும் கரங்களும்
பலமற்றவை என்று சொல்கிறோம்
எங்கள் போராட்டம்
எங்கள் அன்பின் இன்னொரு வடிவம்
அந்த ஈரத்தை எரிக்கவல்ல கங்கு
உங்களிடம் இல்லை
என்று சொல்கிறோம்
அவ்வளவுதான்
No comments:
Post a Comment
வணக்கம். வருகைக்கு நன்றி. தங்கள் கருத்துகளை வழங்கவும்.
தமிழில் டைப் செய்ய Click செய்யவும்