கவிதை 017

  மருத்துவம் மட்டும்தான்

படிப்பா ?

இப்படியாகத்தான்

இந்த நூற்றாண்டிற்கான

சூத்திரர்களுக்கான

கல்வி மறுத்தல் தொடரோட்டத்தை

ஆரம்பித்தான்

ஒரு புள்ளியில்

படித்தவன்

பக்கோடா போடலாமே என்றான்

சுதாரித்தோம்

இல்லையெனில்

பக்கோடா போட

படிப்பெதற்கென்று

நகர்ந்திருப்பான்

இப்போது

சூத்திர

கல்விமறுப்பு குச்சி

அறுபதாயிரம்

யானைகளை

ஒரே கப்பலில் ஏற்றியவனின்

கைகளுக்குப் போனது

அவனோ

மாடு மேய்க்கப்

பழகு

சம்பளம் தருவேன் என்கிறான்

இப்போது

இன்னொருவன் கைகளில்

சூத்திர கல்வி மறுப்பு குச்சி

இன்று

படிப்பைவிட

பக்தி பெரிதென்கிறான்

நாளை

பக்தி போதும்

படிப்பெதற்கென்பான்

குழந்தைகளே

எதற்கும்

சாணி வாளியில்

துடைப்பங்கள்

ஊறியபடியே இருக்கட்டும்

கவிதை 016 / 2025

 என் சொற்களை
பலவீனமானவைகளாக நீங்கள் கருதலாம் 

கூர்மையற்றும்

தரமற்றும்
பயனற்றவையாகவும்கூட 

அவை
உங்களுக்குத் தோன்றலாம்
ஆனால்
ஒடுக்கப்பட்டவன் பக்கம் நின்று
குரல் கொடுப்பவர்களின்
உடன் நிற்கும் என்ற வகையில்
என் சொற்களை
எனக்குப் பிடிக்கும்

கவிதை 015/2025

 தேநீரெதற்கு

பெருவிருந்துதானெதற்கு

வந்தார் வந்தமட்டில்

செல்லை நீங்கி

தொலைக்காட்சிதனை நீங்கி

அன்னார்

முகம் பார்த்து

அளாவுதலே விருந்தோம்பல்

கவிதை 014/2025

 ஏவுகணை தாக்கிய இடத்திற்கு

ஒரு மணி நேர

வான்வெளி பயணதூரம்

பயப்பட

ஏதுமில்லை

என்ற மகனிடம்

பார்த்துவிட்டு வந்த

மாப்பிள்ளை வீடு குறித்தும்

சண்டை

அண்ணன் இடத்திற்கு

கொஞ்சம் தள்ளிதான்

பயப்பட ஏதுமில்லை என்று

மகளிடமும்

சொல்லும் என்னிடம்

சொல்வதற்கு

சுவாரசியமாய் ஏதுமில்லை

கவிதை 13/2025

 

அமெரிக்காவே

நம்ப முடியாத அளவிற்கு

அசிங்கமானது

அமெரிக்கா

கவிதை 12/2025

 ஏவுகணைகள்

நொறுக்கிப்போட்ட

கட்டடங்களின்

சிதிலங்களின்மேல் நின்றபடி

உலகோடு

உரையாடிக்கொண்டிருக்கும்

பத்திரிக்கையாளனின்

இடது காலை

ஏதோ நிமிண்ட

குனிந்து பார்க்கிறான்

அட்டைமாதிரி

ஏதோ ஒன்று

வலது காலால்

தட்டிவிட்டு

விவரணையைத்

தொடர்கிறான்

மீண்டும்

அதே இடது காலை

ஏதோ நிமிண்ட

அட்டையாகத்தான்

இருக்கும் என்று

குனிந்து பார்க்காமலே

சிதிலங்களில் சிக்கிக்கொண்டிருக்கும்

குழந்தையின் விரலை

வலது காலால் தட்டிவிட்டு

விவரணைகளைத்

தொடர்கிறான்

அந்த செய்தியாளன்

கவிதை 11/2025

  

வணக்கம்

நான்

கலெக்டர் பேசறேன்.

கர்னலோட அம்மாங்களா?

ஆமாம் சார்

பாகிஸ்தானோடான சண்டையில்

உங்கள் மகளின் பங்கு

அலாதியானது

மகிழ்ச்சிங்க சார்

உங்கள் குடும்பத்திற்கு

மரியாதை செய்ய

ஆசைப்படுகிறார் ஜீ சார்

மகிழ்ச்சிங்க சார்

நீங்க வந்து

ஜீ சாருக்கு பூ தூவி

என்ன சார் சொல்றீங்க?

சாருக்கு

பூத்தூவ

உங்களுக்கு

நாங்கள் தரும் வாய்ப்புதான்

உங்கள் மகளின்

தியாகத்திற்கு

தேசம் தரும் கௌரவம்

ஏற்றுக்கொள்ள வேண்டும்

நீங்கள்

சார்

என்ன சொல்றீங்க

வண்டி வரும்

வந்து சேருங்க

கவிதை 10/2025

 அன்றொரு நாள்

கடலைப் பார்க்க

போனபோது

அங்கே

கடலிருந்தது

கவிதை 09/2025

 காந்தியை
வரைவதற்காக

அமர்ந்தவர்

வரைந்து முடித்தது
அச்சு அசலாக
அவரது சித்தப்பாவை

என்றாவது
யாரையாவது
வரைய ஆரம்பித்து
காந்தியையும் 

வரைந்து விடுவார்

அவர்

யாரை ஆரம்பித்து 
யாரில் முடித்தாலும்

அவை
ஓவியங்கள்

அவர்
ஓவியர்

கவிதை 08/2025

 தேநீரின் வயது

அறுபத்தியொன்று ஆண்டுகள்

பதினோறு மாதம்

ஒரு நாள் என்பதையே

நம்பமுடியாத உங்களால்

அதன் எடை

போட்டிருக்கும் உடையோடு சேர்த்து

ஐம்பத்தி ஒன்பது கிலோ என்பதை

நம்பவா முடியும்?

உங்களுக்குத் தெரியுமா

தேநீருக்கு

மீசை உண்டு

அதுவும்

நரைத்த மீசை

தேநீருக்கு

நிறைய பெயர்கள் உண்டு

ஒரு பெயர்

எட்வின்

தேநீரின் தோழர்களிடம்

தேநீருக்கு

ஒரு கோரிக்கை உண்டு

எட்வின் எனும்

தேநீரும் ஒருநாள்

மரிக்கவே மரிக்கும்

தேநீரின்

சிதைமீது

ஊட்டி காபி பாரிலிருந்து

வாங்கி வந்த

ஐந்து குவளை

தேநிரைக் கொட்டி

பிறகு தீமூட்டுங்கள்

தேநீரின் சிதை

எரியத் தொடங்குகையில்

மரித்த தேநீர்

உயிர்பெற்று இருக்கும்

All react

கவிதை 07/2025

 

ஏதிலிகளை

சத்திரங்கள்தான்

ஏற்கவேண்டுமெனில்

ஒரு சத்திரமே

என்

தாய் மண்ணாகட்டும்

கவிதை 06/2025

 

விரல்களுக்கிடையே

வியர்வை ஈரமாய்

மரணம்

ஒளிந்துகொண்டிருக்கிறது

அலைபேசியை எடுத்ததும்

பேச முடியாது

விசும்புவதென்பதுகூட

சாகாமல் இருக்கிறோம் என்பதன் வெளிப்பாடுதான்

காரணம் வேறாயினும்

செத்தவர்களுக்காகவும் அழுகிறோம்

இன்னும்

சாகாமல் இருப்பதறிந்தும் அழுகிறோம்

அழுவதற்குத்

தெம்பில்லாதபோது

நான்

வாசிக்கிறேன்

வாசிக்க முடியாது கண்ணெரிந்தால்

உறங்குகிறேன்

வாசித்தலும்

உறக்கமும்

அழுகைதான் என்பது

பெருந்துயர்தான்

சாவுச் செய்தியின்

முகத்தில் முழிக்காத

ஒரு விழிப்புக்காக

செத்தே தொலைக்கலாம்

கவிதை 05/2025

ஒரு போதும்

யார் மீதும்

சேறை இறைப்பதில்லை

வெயில்

கவிதை 04 /2025

 படித்தோரை

படித்த படிப்பிற்கு

பணி தேடித் திரிந்தோரை

பணியில் அமர்ந்தோரை

பணி தந்த ஊதியத்தில்

சொகுசள்ளிப்

புசித்தோரை

காதைத்

திருகி

கரம்பிடித்து

இடதிழுத்து

பசித்தோரை

பசிக்கான காரணத்தை

அறியாத எளியோரை

நினை

அவனுக்காய்

களமேகி உழை என்றுரைத்த

ஊனே

எங்கள் உயிரே

செங்கொடியே

வைகை நீராட

மாமதுரை போனவளே

பார்க்க வாய்க்காமல்

நான் போக வாய்ப்புண்டு

பிள்ளைக்கும்

பேரனுக்கும்

வாய்க்காமல் போனாலும்

என்

எள்ளோ

கொள்ளோ

இல்லை

அடுத்தடுத்து வருபவரோ

உன்னை

கோட்டை ஏற்றி

வருங்காலம்

காப்பார்கள்

இன்குலாப்

இன்குலாப்

இன்குலாப்

ஜிந்தாபாத்

02.04.2025

கவிதை 03/2025

யார் கண்டது

ஜன்னலில் வந்து அமர்ந்த அதை

கவனிக்காது

அலைபேசிக்கொண்டிருந்தேன்

என்ற கோபத்தில்

பாப்பா, பாப்பா என்று

கத்தக் கத்த

காதில் வாங்காமலே பறந்து போன

சிட்டுக்கு

சளி சரியாயிடுச்சா என்று

என்னிடம்

கேட்க இருந்திருக்கும்

கவிதை 02 | 2025

எழுவதற்கு கொஞ்சம்

தாமதமானாலும் பரவாயில்லை

மெனக்கெட்டேனும்

இன்னும் கொஞ்சம் தூங்கி

விழிப்பு வரும்போது வரும் கனவை

பார்த்துவிடுங்கள்

இன்று அப்படியாக

என் கனவில் வந்த

ஒரு பாப்பாக்குருவி

நெஞ்சில்

வலிக்காமல் கொத்திப் பார்த்தது

கழுத்தில் மூக்கைத் தேய்த்தது

பிறகு

எப்போதாவது

கிரிஷ் பயல் திருட்டுத்தனமாய் பார்ப்பதுபோல்

பார்த்துவிட்டு

பறந்துவிட்டது

மெனக்கெட்டேனும் கொஞ்சம் தூங்கி

விழிப்பு வரும்போது வரும் கனவை

பார்த்துவிடுங்கள்

ஏதேனும் ஒரு பாப்பாக்குருவி

உங்களையும் ஆசிர்வதிக்கக்கூடும்

கவிதை 01/2025

 ஒவ்வொரு

நஞ்சுக் குப்பியிலும்

ஒட்டுத்தாள் ஒட்டினார்கள்

ஒவ்வொரு குப்பியின்

ஒட்டுத் தாளிலும்

ஒவ்வொரு நாட்டின் பெயரை எழுதினார்கள்

மூன்று குப்பிகள்

மிச்சப்படவே

எல்லா நாடுகளின் பெயரும் எழுதியாயிற்றா என்று

சரி பார்த்தார்கள்

எல்லா நாடுகளின் பெயர்களை எழுதியபின்னும்

மூன்று குப்பிகள் மிச்சமாய்தான் இருந்தன

என்ன செய்வதென்று முதலாளியைக் கேட்டார்கள்

பத்திரமாய்

வைக்குமாறும்

ஏதேனும் நாடொன்று உடையும் நேரத்தில்

தேடித் தயார் செய்ய இயலாது என்றும் சொன்னவனை

யாரென்று மட்டும்

கேட்டுவிடாதீர்கள்

வெள்ளையாய் இருக்கும்

அவன் வீடு என்பதைத் தவிர

சொல்வதற்கு ஏதுமில்லை

என்னிடம்