28

 முதல் மழைக்கும்
இரண்டாவது மழைக்கும்
இடையேயான
இடைவெளி நீ

29

 
பார்க்கவே முடியலையே
என்ன ஆச்சு
பார்த்துதான்
என்ன ஆச்சு

30

 
குளத்தில் முழுகிச் செத்த
குழந்தையின் படத்தை
பேப்பரில் பார்த்த நொடியில்
என்னோடு
கலியன் கடையில்
தேநீர் குடித்துக்கொண்டிருந்த காலன்
தம்ளரில் மிச்சம் இருந்த தேநீரில் முழுகிச்
செத்துப் போனான்

31

 
வைப்பர்
அழிக்க அழிக்க
எனக்கான கவிதையை
எழுதிக்கொண்டே இருக்கிறது
மழை

32

 
சிராய்ப்புத்
தழும்புகளின்
அழகை
ரசிப்போம்
சிராய்த்தவர்கள்
ஆசிர்வதிக்கப்படட்டும்

33

 
மழையில் நனைந்து கொண்டே
அழுவதில் ஒரு சௌகர்யம்
ஏன் நனைகிறாய் என்றுதான் 
கேள்வி வரும்

34

ஏதோ

ஏழெட்டு நாட்களுக்கு முன்பே

விடிந்தது போல்

நீளமாய் நகர்கிறது எனது இன்று

ஒரு மணி போராட்டத்தில்

ஒரு நொடி நகர்கிறது

அழுத்த அழுத்த

கண்களை உடைத்துவிட வேண்டாமென

மரமல்லி மரம் போகிறேன்

நாலைந்து பூக்களைத் தலை சிரிந்து

ஆறுதலிக்கும் அந்த மரத்தாயை

அண்ணாந்து பார்க்கும் அந்தப் புள்ளியில்

காம்பைப் பிரிகிறது ஒரு பூ

காம்புகளைப்

பிரியும்தான் பூக்கள்

ஆனாலும்

அந்தப் பூவை

அது காம்பைப் பிரியும்போது

பார்த்திருக்க வேண்டாம்

35

 
சீக்கிரம் வா
நனைகிற சூட்டில்
மழை

36

 
காடென்பது
கலைந்து கிடக்கும்
ஒழுங்கு

37

 
அந்திக் கருக்கையில்
வெளிச்சத்தை
அள்ளிக்கொள்ள வேண்டுமென்ற
ஆதி நிபந்தனையோடு

என் சாட்சியாக

தாங்கள்

நிழல் உலர்த்தும் இடம்போக

மீதித் தோப்பை

தன் வெளிச்சத்தை உலர்த்திக் கொள்வதற்கான

சூரியனோடான ஒத்தியை

நீட்டித்துக் கொண்டது

மூத்த மரம்

38

 

வெளிச்சமாக இருக்கிறது எங்கும்

சர்ப்பம் தோலுரித்து

புதுத்தோல் எடுப்பதுபோல்

உன் பாசுர சுவர்

உரசியுரசி

என்னை உரித்து

புது நானான எனக்கு

வெளிச்சமும் வெப்பமும்

கூச்சத்தையும் எரிச்சலையும் தருகிறது

கொஞ்சம் இருட்டாக வா

39

 
நீ தந்த தண்ணீரில்
வளர்ந்தது
நீ தந்த தாகம்

40

 
யாரோ ஒருவன்
கொஞ்சம் கடல் அள்ளி

கொண்டைக் கடலையாக்க

யாரோ ஒருவன்

கொண்டைக் கடலையான

அந்தக் கொஞ்சம் கடலை சுண்டலாக்க

யாரோ ஒருவன்

சுண்டலான

அந்தக் கொஞ்சம் கடலை

ஒரு

வாளியில் அடைக்க

கடல் பார்க்கப்போன நான்

பத்து ரூபாய்க்கு வாங்கிய

ஒரு பொட்டல்ம்

சுண்டலெனும் கொஞ்சம் கடலை

தின்னுவதா

பருகுவதா

குழப்பத்தில் நிற்கிறேன்

41

 
அகப்படவில்லையா
படிக்கிறமாதிரியெதுவும்

முடித்துவிட்டானா ஏற்கனவே
இருக்கிறதனைத்தையும்

அல்லது இதுதானா
அவனது குணமே

எதுவானால் என்ன

நிம்மதியை 

வைத்துவிட்டுப் போயிருக்கிறான்

புரட்டிக் கொண்டிருந்த

புத்தகங்களில் எதையும்
சுட்டெடுத்துப் போகாத புத்தன்

42

 
மேற்கிருந்து கிழக்காக நானும்
கிழக்கிருந்து மேற்காக

ஒருவரை ஒருவர் கடக்கிறோம்

என்ன

சென்றுகொண்டிருந்த நானும்

வந்துகொண்டிருந்த அவரும்

இப்போது

சென்றுகொண்டிருக்கிறோம்

43

 

பெய்துகொண்டிருந்த மழை

நிற்கத் துவங்குவதாகவும்

நின்று கொண்டிருந்ததால்

தனக்கு கால் வலிப்பதாகவும்

பாட்டி நாற்காலியில் அமர

நின்றால்

மழைக்கும் கால் வலிக்குமே என்று

நாற்காலி வரைகிறாள் பேத்தி

44

 

குரைக்கிற

நாயும்

கடிக்கும்

45

 
பொம்மைக்காக ஏந்தப்பட்ட
குழந்தையின் கைகளில் பணக்கட்டும்

பணத்திற்காக ஏந்தப்பட்ட

மனிதனின் கைகளில் பொம்மையும் விழ

கடாசி எறிந்துவிட்டு

கடந்து போயினர் இருவரும்

46

 

ஹைகூ கவிதைகள்

இரண்டு

என் பல்லிடுக்கில்

47

 
தற்கொலை செய்யத் தெரியாது
யாரையும் எங்களுக்கென்ற
தைரியத்தில்
எத்தனை காலத்துக்கு
எங்களை
தற்கொலை செய்வீர்கள்