Thursday, June 27, 2019

ஊருல எங்க? நாட்டுல எங்க? காட்டுங்க எங்க ஸ்கூல் போல ஜனவரி 2019


தோழர் ஜெயசீலன் பள்ளிக்கு வந்திருந்தார். இப்போதெல்லாம் எப்போதாவதுதான் சந்திக்க முடிகிறது. மார்க்சிஸ்ட் கட்சியின் திருச்சி புறநகர் மாவட்ட செயலாளராக தேர்ந்தெடுக்கப் பட்டதில் இருந்து அவரால் சொந்த அலுவல்களுக்காக அவரால் நேரம் ஒதுக்க முடிவதில்லை. அதைப் பேசி இதைப் பேசி இறுதியாக குழந்தைகளின் படிப்பு நோக்கி வந்துகொண்டிருந்தபோது சரியாக வந்து சேர்ந்தாள் 7B சந்தியா.

“MAY I GET IN?”

சற்றே குனிந்த நிலையில் வலது கையை நீட்டியபடிதான் கேட்டாள். அதற்காக நீங்கள் அதைப் பணிவு என்றெல்லாம் கொண்டுவிடக் கூடாது. ஒழுங்கீனம் என்ற வகையிலும் அதை சேர்த்துவிடக் கூடாது. அனுமதி கோரல் மாதிரியான தகவல் தெரிவித்தல் அது. ‘உள்ள வரேன், வேற வேலைகளில் இருந்து என்னிடம் கவனத்தை ஒதுக்குஎன்ற அன்பு கலந்த உத்தரவு.

தகப்பனின் அலுவலகத்திற்குள் நுழையும் முன் அந்தக் குழந்தைக்கும் தகப்பனுக்கும் இடையே தேவைப்படும் ஒருவிதமான இங்கித நடைமுறை என்ற அளவில்தான் அது இருக்கும். அதே வேளை பத்து முதல் பன்னிரண்டு வரை உள்ள குழந்தைகளிடத்தில் இந்த அளவிற்கு இயல்பாய் இருக்க முடியவில்லை. பலநேரங்களில் ஒரு சராசரியான தலைமை ஆசிரியராகவே அவர்களிடம் வெளிப்பட முடிகிறது. இதில் ஏகத்துக்கும் வருத்தம்தான் என்றபோதிலும் தவிர்க்கவும் இயலவில்லை.

சின்னப் பிள்ளைகளிடம் அப்படி இருப்பதற்காக நண்பர்களிடம் நான் நிறைய வாங்கிக் கட்டிக் கொள்ளவேண்டி இருக்கிறது. ரொம்பவும் செல்லம் கொடுப்பதாகக் கூறுகிறார்கள். அவர்களுக்கு கொடுப்பதற்கு அதைத் தவிர வேறு என்ன இருக்கிறது என்னிடம்?. இன்னும் நிறைய செல்லத்தை செலவளித்துவிட்டு இன்னும் அதிகமாய் நண்பர்களிடம் வாங்கிக் கட்டிக்கொள்ளவும் தயாராய்த்தான் இருக்கிறேன்.

இவ்வளவு நீளமாக எழுதுமளவிற்கான நேரத்தையெல்லாம் எடுத்துக் கொள்ளவில்லை. அவசர அவசரமாக அவளை, “வா வாஎன்று அழைத்தேன்.

ஏன் இவ்வளவு பதறுறீங்க?” என்ற ஜெயசீலனிடம், “இல்ல ஜெயா, கொஞ்சம் தாமதிச்சா அவளாவே வந்துடுவா. நாம கூப்டதாவே இருக்கட்டும்என்று சிரித்தபடியே கூறினேன்.

அவரும் சிரித்தவாறே என் நாற்காலிக்கு வலதுபுறமாய் நாற்காலியோடு உரசியபடி ஆடிக்கொண்டே மேசையில் விரலால் ஏதோ கிறுக்கிக் கொண்டிருந்தவளிடம்,

ஏன் பாப்பாமே கெட் இன்னு கேக்கறியேசார்எல்லாம் சொல்ல மாட்டியா?” என்று கேட்டு முடிப்பதற்குள் தெறித்தாள்,

அதெல்லாம் எங்க சாருக்குத்தான்

வெடித்து சிரிக்கிறார்.

இப்ப என்ன பொண்ணு பிரச்சினை?”

எனக்கும் சயின்ஸ் சாருக்கும் பிரச்சினை

யாரு உங்க சயின்ஸ் சார்?”

செல்வகுமார் சார்

செல்வகுமாரா? அவரு நல்ல பையனாச்சே. நீதான் ஏதோ வம்பிழுத்திருக்க. ஆமா, நீ என்ன செஞ்ச?”

நான் ஒன்னும் செய்யல. அவங்கதான் என்னோட பேச மாட்டேங்கறாங்க. எல்லாரையும் கேள்வி கேக்கறாங்க. என்னை மட்டும் கேக்க மாட்டேங்கறாங்க

அதுதான் ஏன் னு கேக்கறேன்

தெரியல, பதில் தெரியாதவளை எல்லாம் கேக்கறாங்க. என்னை மட்டும் கேக்க மாட்டேங்கறாங்க

வலது பக்கமாக தலையை திருப்பியவாறே தோழர் ஜெயசீலன் சிரித்துக் கொண்டிருக்கிறார்.

அதுக்கு நான் என்ன செய்யனும் கிழவி

நீங்கதான HM?”

ஆமா, ஆமாஎங்க போற போக்கில பதவி இறக்கம் செஞ்சுடுவாளோ என்ற பயம் கவ்விக் கொள்ளவே பதறிப்போனவனாய் ஆமோதிக்கிறேன்.

அப்ப ஜோயல் அண்ணன அனுப்பி சார கூப்ட்டு திட்டி என்னோட பேசச் சொல்லுங்க

நீ என்னமோ தப்பு செஞ்சிருக்க. இல்லாட்டி அவன் அப்படி எல்லாம் செய்ய மாட்டான். சரி க்ளாசுக்கு போ. உங்க சாரக் கூப்ட்டு உன்னோட பேசச் சொல்றேன்

போக எத்தனித்தவள்,

நீங்க சார திட்ட மாட்டீங்க எனக்குத் தெரியும்

என்ன தெரியும் கிழவிக்கு?”

தெரியும்

ஜெயா இன்னமும் விடாது சிரித்துக்கொண்டே இருக்கிறார்.

என்ன தெரியும் எரும மாடு?”

சயின்ஸ் சார் உங்க ஸ்டூடண்ட். அதனால திட்ட மாட்டீங்க

எனக்கே உடைத்துக்கொண்டு சிரிப்பு வந்து விட்டது.

ஏம்புள்ள நீயும் என் ஸ்டூடண்ட்தானே

இல்ல. உங்க ஸ்டூடண்ட்னா நான் எப்படி ஆறாங்கிளாஸ் பாஸ் பண்ணி இருப்பேன்

உங்க சயின்ஸ் சாரும் ஏங்கிட்டதானே படிச்சான். அவன் மட்டும் எப்படி பாஸ் செஞ்சான்?”

அவங்க பக்கத்து பையன பார்த்து எழுதியிருப்பாங்க

ஏய்…”

எழுவதற்குள் ஓடிவிட்டாள்.

எழுந்து சுவரை பிடித்தவாறே சிரிக்க ஆரம்பித்து விட்டார் ஜெயா.
******************************************* 
















65/66 காக்கைச் சிறகினிலே ஜனவரி 2019


நடந்து முடிந்த ஐந்து மாநிலங்களுக்கான சட்ட மன்றத் தேர்தலுக்கான பிரச்சாரத்தின் போது ஏகத்திற்கும் எதை எதையோ பேசினார்கள் பாஜக தலைவர்கள். அவர்களுள் குறிப்பாக உத்திரப் பிரதேச முதலமைச்சர் மரியாதைக்குரிய ஆதித்யநாத் அவர்கள் தனது ராஜஸ்தான் பிரச்சாரத்தின்போது உச்சத்திற்கே சென்றார்.

மனிதர்களுக்கே ஜாதி இருக்கக்கூடாது என்று நாம் போராடிக் கொண்டிருக்கிற காலத்தில் அவர் ஆண்டவர்களுக்கு இடையேகூட ஜாதி இருக்கிறது என்பதை தனது பிரச்சாரத்தின் ஊடே தெரிவித்தார்.

ராமனுடைய நெருங்கிய நண்பரானஅனுமன்ஒரு தலித் என்று அவர் பிரகடனப் படுத்தினார். நிறையபேர் இதற்கு எதிராக பொங்கினார்கள்.

ஏதுமற்ற இறைவனை எப்படி ஒரு ஜாதிக் குமிழுக்குள் அடைக்கலாம் என்று பொங்குகிறார்களா என்று பார்த்தால் ஏமாந்துதான் போவோம்.

அனுமன் தலித் என்று அவர் கூறியதும் அவர் ஒன்றும் தலித் அல்ல அவர் பழங்குடியினர் என்று தெசியத் தாழ்த்தப்பட்டோர் மற்றும் பழங்குடி ஆணாஇயத் தலைவர் திரு நந்த கிஷோர் கொதித்தார்.

ஒரு பிராமணரைப் போய் எப்படி தலித் என்று இழிவாக்க் கூறலாம் என்று ஆதித்யநாத்தை கடிந்து கொண்டார் மத்திய அமைச்சர் சத்யபால் சிங்.

ஒருவர் அனுமனது சாதிச் சான்றிதழ் கேட்டு வாரணாசி மாவட்ட ஆட்சித் தலைவரிடம் மனு செய்திருக்கிறார்.

பிராமணர் சங்கத் தலைவர் இதுகுறித்து ஜெய்பூர் நீதிமன்றத்தில்,வழக்குத்  தொடர்ந்திருக்கிறார்.

அதிர்ந்துபோன ஆதித்யநாத்அய்யய்யோ அனுமனை இழிவு படுத்த வேண்டும் என்ற நோக்கத்தில் அவனை தலித் என்று சொல்லவில்லை. தலித் இறைவனும் உண்டு என்று தலித்துகளை கௌரவப் படுத்தவே அப்படி சொன்னேன்என்று இறங்கி இருக்கிறார்.

ஒரே கேள்விதான் ஆதித்யநாத்,

தலித் சாமியை கோவிலுக்குள் வைக்கும் நீங்கள் கோவிலுக்குள் சாமி கும்பிடுவதற்காக நுழைய முற்பட்ட ஒரு பெண்ணை நிர்வாணப்படுத்தி அவளை கீழே தள்ளியும் அடித்தும் உதைத்தும் மட்டும் அல்லாமல் அவற்றை காணொலிக்குள் காட்சிப்படுத்தி சமூக வலை தளங்களுள் அதை வெளியிட்டு கூத்தடிக்கும் கயவர்களது செயலை ஏன் இன்னும் கண்டிக்க வில்லை?

********************** 

ரஃபேல் விவகாரத்தில் எந்தவிதமான முறைகேடும் நடக்கவில்லை என்று உச்சநீதிமன்றம் தீர்ப்பளித்துவிட்டது. எனவே பொய்யான தகவல்களை கூறிய திரு ராகுல் அவர்கள் அவைக்கு வந்து அதற்காக மன்னிப்பு கேட்கும் வரைக்கும் அவையை நட்த்தவிடமாட்டோம் என்று பாஜக நாடாளுமன்றத்தின் இரு அவைகளையும் முடக்கிப்போட முயற்சித்தன. மாண்புமிகு ஜேட்லி அவர்களும் நிர்மலா அவர்களும் வானத்திற்கும் பூமிக்குமாய் குதித்தார்கள். ஊடகங்கள் எல்லாம் ஒன்று சேர்ந்து ரஃபேல் விவகாரத்தில் உச்சநீதிமன்றமே மோடியின் நேர்மை கண்டு உச்சி முகர்ந்ததைப்போல சிலாகித்து கதையளந்தன.

இந்தக் கூத்தெல்லாம் உச்சத்தில் இருந்த நொடியொன்றில்ரஃபேல் குறித்த தங்களது அறிக்கையை உச்சநீதிமன்றம் தவறாகப் புரிந்து கொண்டு தவறான விளக்கத்தை அளித்துள்ளதுஎன்று கூறியுள்ளது. அது மட்டுமல்ல தனது தவறான புரிதலையும் விளக்கத்தையும் அது சரி செய்துகொள்ள வேண்டும் என்றும் உச்சநீதிமன்றத்தை மத்திய அரசு கோரியுள்ளது.

முதல்நாள் உச்சநீதிமன்றமே தமது புனித்ததை பூமாறிப் பொழிந்து கொண்டாடியதாகக் கூறிய பாஜகவினர் அடுத்தநாளே தமது அறிக்கையை உசாநீதி மன்றம் தவறாகப் புரிந்து கொண்டு தவறாக விளக்கம் அளித்துவிட்டதாகவும் பதறுவது ஏன்?

1)   உச்சநீதிமன்றத்திற்கு இவர்கள் என்ன கொடுத்தார்கள்?
2)   அவற்றுள் எந்தப் பகுதியை உச்சநீதிமன்றம் தவறாகப் புரிந்து கொண்டது?
3)   அது எப்படி இதை தவறாக விளக்கியது?

இவற்றுக்கெல்லாம் முன்னதாக நாம் இன்னொரு விஷயத்தை தெளிவாக்கிக் கொள்வது நல்லது.

உச்சநீதிமன்றம் தவறாக விளக்கிவிட்டது என்று இவர்கள் கூறுவது அதனுடைய தீர்ப்பாகத்தான் இருக்கும். எனில், தவறாக விளக்கிவிட்டீர்கள் என்பதன் சரியான பொருள் தவறாக தீர்ப்பளித்து விட்டீர்கள் என்பதாகத்தான் இருக்கும்.

ரஃபேல் ஒப்பந்தத்தில் உள்ள முறையீடுகளை நாடாளுமன்றத்தின் கண்காணிப்போடு விசாரிக்க வேண்டும் என்று உச்சநீதி மன்றத்தில் திவாளர்கள் யஷ்வந்த் ஷின்கா, அருண்சோரி மற்றும் ஷாந்திபூஷன் ஆகியோர் வழக்கு தொடர்ந்தனர்.

உச்சநீதிமன்றத் தலைமை நீதிபதிரஞ்சன் கோகாய் தலைமையில் மூன்று நீதிபதிகள் கொண்ட அமர்வு இதை விசாரித்து சமீபத்தில் தீர்ப்பினை வழங்கியது. அந்த்த் தீர்ப்பில்,

1)   மத்திய அரசின் கொள்கைகளில் நீதிமன்றம் தலையிட முடியாது
2)   ரஃபேல் விவகாரத்தில் அரசின் கொள்கை முடிவுகள் சரியானவை
3)   ரஃபேல் விமான்ங்களின் விலை குறித்த தகவல்கள் அடங்கிய மத்திய கணக்குத் தணிக்கைத் துறையின் (CONTROLLER AND AUDITOR GENERAL) அறிக்கை பொதுக் கணக்குக் குழுவிடம் வழங்கப்பட்டுள்ளது.


அரசாங்கத்திற்கும் CAG அவர்களுக்கும் இதுகுறித்து கடிதப் போக்குவரத்து நடைபெற்றிருப்பதாகவும் CAG இதுகுறித்து ஒரு அறிக்கையை வெளியிட்டிருப்பதாகவும் நீதிமன்றம் கூரியது. அத்தோடு நிற்காமல் அந்த அறிக்கை பொதுக் கணக்குக் குழுத் தலைவருக்கு அனுப்பப்பட்டிருப்பதாகவும் அந்த அறிக்கை நாடாளுமன்றத்தில் தாக்கல் செய்யப்பட்டிருப்பதாகவும் நீதிமன்றம் சொன்னது.

இதை மேம்போக்காகப் படித்துவிட்டுதான் பாஜகவினரும் அவர்களது ஊடக விசுவாசிகளும் இவ்வளவு கூப்பாடு போட்டது. தீர்ப்பின் இந்த இடத்தில்தான் பிரச்சினை கிளம்பியது. CAG அவர்களின் அறிக்கை பொதுக் கணக்குக் குழுவிடம் ஒப்படைக்கப் பட்டது என்று எதன் அடிப்படையில் உச்சநீதிமன்றம் கூறுகிறது என்று எதிர்க்கட்சித் தலைவர் திரு மல்லகார்ஜுனே கேள்வி எழுப்பினார்.

மல்லிகார்ஜுனேவின் இந்தக் கேள்விதான் மத்திய அரசை நிலைய வைத்த்து. காரணம் திரு மல்லிகார்ஜுனே அவர்கள்தான் பொதுக் கணக்குக் குழுவின் தலைவர். எனக்கே வராத CAG அறிக்கையை எப்படி நீதிமன்றம் படித்தது என்று அவர் கேட்டார்.

இப்போது மத்திய அரசு கூறுவது இதைத்தான்,

பொதுக் கணக்குக் குழுவிடம் ஒப்படைக்க இருக்கிறோம் என்றுதான் நாங்கள் உச்சநீதிமன்றத்திடம் தெரிவித்திருந்தோம். உச்சநீதிமன்றம் பொதுக்குழுவிடம் ஒப்படைத்திருக்கிறோம் என்று நாங்கள் கூறியதாகத் தவறாகப் புரிந்து கொண்டு விளக்கமளித்திருக்கிறது.”

இரண்டுதான்,

1)   அரசு நீதிமன்றத்திற்கு தவறான தகவல்களைத் தந்திருப்பின் அதற்கு உரியவர்களை கடுமையாகத் தண்டிக்க வேண்டும்
2)   ஒருக்கால் அரசு சரியான தகவல்களைத் தந்திருந்து தாம் அதைத் தவறாகப் புரிந்துகொண்டு தவறான விளக்கத்தைத் தந்திருப்பதாக நீதிமன்றம் உணருமானால் குறைந்த பட்சம் அந்த விளக்கத்தை சரியாக்கித் தர வேண்டும்.

கஜா புயல் பாதிப்பு காரணமாக
பகவான் டீக்கடையில் வைத்துள்ள 15.12.18 ஆம் தேதி வரைக்குமான
அனைத்து கடன்களும் தள்ளுபடி செய்யப்படுகிறது

என்று ஒரு சிறிய போஸ்டர் வம்பன் நான்குரோட்டில் உள்ள ஸ்ரீபகவான் தேநீர்க்கடையில் வைக்கப்பட்டுள்ளது.

வழக்கமாக அந்தப் பகுதி மக்கள் பகவான் டீக்கடையில்தான் தேநீர் பருகுவார்கள். அந்தப் பகுதி விவசாயத் தொழிலாளிகளும் பிற கூலித் தொழிலாளிகளும் அந்தக் கடையில் பற்று வைத்து தேநீர் மற்றும் வடை போண்டாக்களை சாப்பிடுவது வழக்கம்.

இந்த நிலையில் கஜா அவர்களது வாழ்க்கையை சின்னாபின்னமாக்கிவிட்டு போயிருக்கிறது. ஏதுமற்ர நிலையில் இருக்கும் அந்தத் தொழிலாளிகளிடம் ஒரு கோப்பைத் தேநீர் குடிப்பதற்கும் காசில்லை.

இந்த நிலையில்தான் அந்த தேநீர்க்கடையின் உரிமையாளரான திரு சிவா அவர்கள் தமீடம் அந்தத் தொழிலாளிகள் வைத்திருக்கக் கூடிய கடன் அனைத்தையும் தள்ளுபடி செய்திருக்கிறார்.

மாதாமாதம் கணக்குப் பார்த்து பணம் கொடுப்போருக்கு மட்டும்தான் கடன் என கணாக்கு எழுதி வைப்பேன். கடை வைத்த காலத்தில் சிலர் கடன் சொல்லிவிட்டு டீ குடித்த கணாக்கையும் சேர்த்து சில ஆண்டுகளாக வாடிக்கையாளர்கள் டீ குடித்த கடன் முழுவதையும் தள்ளுபடி செய்துள்ளேன்.

ஒவ்வொருவருக்கும் அது சொற்ப தொகைதான். ஆனாலும்கூட என்னால் முடிந்த்தை என் வாடிக்கையாளர்களுக்கு செய்தது அவர்களுக்கு மகிழ்ச்சியைத் தந்துள்ளது.

நான் தள்ளுபடி செய்தது வெறும் பத்தாயிரம் ரூபாய்தான் என்றாலும் என் மக்களுக்கு என்னால் முடிந்ததை செய்துள்ளேன் என்பதில் ஏகத்துக்கும் மகிழ்கிறேன்

தன் மக்களுக்காக பத்தாயிரம் ரூபாய் கடனைத் தள்ளுபடி செய்ததற்கே ஒரு மனிதனால் இவ்வளவு மகிழ முடியும் என்றால்….

யோசித்துப் பாருங்கள் திரு எடப்பாடி அவர்களே.

**********************



  



    

Labels