காஸா கவிதை 02
***********************
06.06.2024
வியாழக்கிழமை
ஒதுங்கிய அனைவரும்
கொல்லப்பட்டிருக்கக் கூடும்
என்ற முடிவுக்கு வரும்வரை
குண்டு வீசியது
இஸ்ரேல்
டிப்பர்களில்
அள்ளிப் போனதில்
பிணங்களோடு
குற்றுயிராய் இருந்தவர்களும்
இருக்கக் கூடும்
டிப்பரில் கிடந்த
குவியலில்
கிடந்த
ஒரு குழந்தையின் கையில்
செல்
யாருக்கோ
குறுஞ்செய்தி
அடித்திருக்கிறான்
மாமா
மூன்றாவது கேட்டில் நுழைந்து
மூன்று பிணங்களைக் கடந்து
வலதுபுறம் திரும்பினால்
ஏழாவது பிணம் அம்மா
ஒன்பதாவதாக
அப்பா
அம்மாவுக்கும் அப்பாவிற்கும்
இடையில்
எப்போதும்போல நான்
நீங்கள் வரும் முன்
நான் இறந்து போயிருந்தால்
இந்த செல்லை
ஏதேனும் ஒரு குழந்தைக்கு கொடுங்கள்
அவளது மாமாவேனும்
விரைவாக வந்து
அவளைக்
காப்பாற்றட்டும்
No comments:
Post a Comment
வணக்கம். வருகைக்கு நன்றி. தங்கள் கருத்துகளை வழங்கவும்.
தமிழில் டைப் செய்ய Click செய்யவும்