பாத்துட்டே பேசலாம்ல

 

ஷீனாவிற்கு சுடி எடுப்பதற்காக நானும் கீர்த்தியும் சென்றிருந்தோம்

சன்ன நடுத்தரக் குடும்பம் ஒன்று திருமணத்திற்கு துணி எடுத்துக் கொண்டிருக்கிறார்கள்

மகளுக்கு போலும்

அந்த மனிதரின் முகத்தில் அப்படியொரு மகிழ்ச்சி

திடிரென்று பொடிசு ஒருத்தி செல்லோடு அவரிடம் ஓடி வருகிறாள்

”அப்பா அண்ணன்”

புடிங்கி காதில் வைத்தவர்,

சாப்ட்டியாப்பா

நெகிழ்கிறேன்

அது வீடியோ கால்

பார்த்துட்டே பேசுங்க சார் என்கிறேன்

அவர் என் இனம்போல

காதுல வச்சாலே சரியா கேக்காதுங்களே என்கிறார்

நான் பேசியது அந்தப் பிள்ளைக்கு கேட்டிருக்கும்போல

யாராச்சும் வந்தா அப்பாக்கு நல்ல ஹெட்போன் அனுப்பனுங்க சார். பாத்துக்கிட்டே பேசுவார்ல

இல்லப்பா, அதுக்கு மிசினே வாங்கித் தந்துடலாம்ல

செவுட்டு மிசின்ங்களா. வெளியத் தெரியுமே

தெரியாதுப்பா என்று சொல்லிவிட்டு காதுக்குள் இருந்த என் மிசின்களை எடுத்துக் காட்டுகிறேன்

நீங்களும் செவிட்டு மிசின் வச்சிருக்கீங்களா?

ஆமாம்பா

எவ்வளவு ஆகுங்க

சொல்கிறேன்

வரப்ப வாங்கித் தரனும். பாத்துட்டே பேசலாம்ல

கொஞ்சமும் போலி இல்லை

அன்பு

அன்பு

இப்படியே இருங்கப்பா

வேறென்ன சொல்ல