கலைஞர் + நீங்கள், ஸ்டாலின் சார்

 

அன்பிற்குரிய முத்துவேல் கருணாநிதி ஸ்டாலின் சார்,
 
வணக்கம்.
 
கீழ்க்காணும் எஸ். அறிவுமணியின் கவிதையை நீங்கள் வாசித்திருப்பதற்கு கொஞ்சமும் வாய்ப்பில்லை. ஆனால் இந்த கவிதை எதைக் கோரி கையேந்தி நிற்கிறதோ அதை நிறைவேற்றிய இருவரில் நீங்கள் ஒருவர். மற்றொருவர் பெருந்தலைவர் காமராசர்.
 
இருவருக்கும் என்னவொரு பொருத்தமெனில் அவரும் இந்த கவிதையை வாசித்திருக்க வாய்ப்பில்லை. மேற்கொண்டு நான் இந்தக் கடிதத்தைத் தொடர்வதற்கு முன் தயவு செய்து இந்த கவிதையை ஒருமுறை வாசித்து விடுங்கள்.
 
”தாயே
தாலாட்டை நிறுத்து
பசிக்கிறபோது
எப்படி தூங்குவது?
 
தந்தையே
அறிவுரையை நிறுத்து
பசிக்கிறபோது
எப்படி கேட்பது?
 
ஆசானே
பாடத்தை நிறுத்து
பசிக்கிறபோது
எப்படி படிப்பது?
 
எல்லோரும்
எல்லாவற்றையும் நிறுத்துங்கள்
என் பசிக்கு
பதில் சொல்லுங்கள்”
 
பொழிப்புரை தேவைப்படாத எளிய வார்த்தைகள். ஆனால் அளவிட முடியாத ஆழம். பசி பத்தையும் பறக்க வைக்கும் என்பதை அறிவோம்.
 
பசிக்கிற வயிறோடு படிப்பது சாத்தியப்படாது என்கிற எதார்த்தத்தை பெருந்தலைவரும் நீங்களும் மிகச் சரியாகப் புரிந்துகொண்டிருக்கிறீர்கள். அந்த ஈரம்தான் என்னைப்போன்ற மாற்று இயக்கத்தினரையும் உங்களின்பால் இவ்வளவு இறுக்கமாகக் கட்டிப்போட்டிருக்கிறது.
 
அன்றைய பள்ளிக்கல்வித் துறையின் இயக்குநர் நெ.து.சுந்தரவடிவேலு ஆய்விற்காக ஒரு பள்ளிக்கு செல்கிறார். அன்றைய கூட்டு வழிபாட்டின்போது நிறைய குழந்தைகள் மயங்கி விழுந்திருக்கிறார்கள். காலை உணவு இல்லாததால்தான் குழந்தைகள் மயங்கி விழுவதாகவும், இது தினமும் நடக்கிற ஒன்றுதானென்றும் அவருக்குத் தெரிய வருகிறது.
 
இந்த செய்தியை நெ.து.சுந்தரவடிவேலு, அன்றைய முதல்வர்  பெருந்தலைவர் காமராசருக்கு கடத்துகிறார். பெருந்தலைவர் பதைபதைத்துப் போகிறார். நிலா காட்டி சோறூட்டும் வழக்கம் இருக்கிற பூமியில் குழந்தைகளை பசி தின்று சாய்ப்பதா? என்று துடிக்கிறார்.
 
அதிகாரிகளோடு இருவரும் உரையாடுகிறார்கள். அப்போதிருந்த நிதிச்சுமையில் எதுவும் அரசால் செய்ய இயலாது என்ற எதார்த்தத்தை எடுத்து வைக்கிறார்கள் அதிகாரிகள்.
 
“தெருவிறங்கி பிச்சையெடுக்கிறேன். நிறைந்த வயிறோடு குழந்தைகள் படிக்கட்டும்.”
 
இப்படித்தான் பெருந்தலைவர் சொன்னாராம் ஸ்டாலின் சார்.
 
இதன் விளைவாக பள்ளிகளில் மதிய உணவுத் திட்டம் வருகிறது. காலை உணவு இல்லை என்பதால்தான் பிள்ளைகள் மயங்கி விழுந்தது. ஆனால் அவர்களுக்கு கிடைத்ததோ மதிய உணவு.
 
எனவே காலையில் கூட்டுப் பிரார்த்தனைக் கூட்டங்களில் பிள்ளைகள் மயங்கி விழுவது தொடர்ந்துகொண்டேதான் இருந்தது. அதேநேரம் மதிய உணவுத் திட்டம் பேரதிகமாக பிள்ளைகளை பள்ளிக்கு ஈர்த்தது.
 
வேறொன்றுமில்லை, அன்றைய வறுமை அப்படித்தான் இருந்தது. பள்ளிக்குப் போனால் மதிய உணவேனும் கிடைக்கும் என்பதால் பிள்ளைகளின் வரத்து அதிகரித்தது.
 
இப்படியாக பள்ளிக்கு வந்தவர்களில் பலர் பெரிய மருத்துவர்களாக மாறினார்கள் என்பது வரலாறு.
 
இதற்கு காரணம் பள்ளியில் கிடைத்த கல்வியா? அல்லது பள்ளியில் கிடைத்த உணவா? என்று பட்டிமன்றமே நடத்தலாம். ஆனால் இரண்டில் ஒன்றை ஒருபோதும் தீர்ப்பாகக் கூறமுடியாது. பள்ளியில் கிடைத்த கல்வியும், பசியாற்றிய மதிய உணவும்தான் இதற்கு காரணம்.
 
எண்பதுகளின் மத்தியில் வேலைக்கு வருகிறேன். பணிக்கு வந்த முதல் நாளே கூட்டுப் பிரார்த்தனைக் கூட்டத்தில் பசியால் பிள்ளைகள் மயங்கி விழுவதைப் பார்க்க முடிகிறது. அடுத்த நாளும், அதற்கடுத்த நாளும், ஒவ்வொரு நாளும் குழந்தைகள் விழுந்துகொண்டே இருப்பது தொடர்கிறது. இத்தனைக்கும் எங்கள் பள்ளி கொஞ்சம் பெரிய குழந்தைகள் படிக்கும் ஒரு மேல்நிலைப் பள்ளி. எனில், சின்ன குழந்தைகள் படிக்கும் தொடக்க பள்ளிகளின் நிலை?
 
சில நண்பர்கள் குழந்தைகளுக்கான “காலை உணவு” குறித்து கத்தத் தொடங்குகிறோம். நாங்கள் பேசி யாருக்குக் கேட்கும் ஸ்டாலின் சார்?
ஆனாலும் விடாது வாய்ப்புக் கிடைக்கும் இடங்களில் எல்லாம் இதுகுறித்து பேசுகிறோம்.
 
அன்றைய பள்ளிக் கல்வித்துறையின் இணை இயக்குநர் கார்மேகம் சார் மாதிரி அதிகாரிகளிடம் இதைக் கொண்டு போகிறோம். அவர்களும் பேச ஆரம்பிக்கிறார்கள். ஆனால் விடியவில்லை.
 
இந்த கோரிக்கை எப்படி, யார்வழியாக உங்களுக்கு வந்தது என்று தெரியவில்லை. அரசு மற்றும் ஆதிதிராவிட தொடக்கப்பள்ளி குழந்தைகளுக்கு காலை உணவு வருகிறது.
 
போதாது என்கிறோம். அரசு உதவி பெறும் பள்ளிகளுக்கும் விரிவுபடுத்துகிறீர்கள்.
 
பள்ளியின் வருகைப்பதிவு எகிருகிறது. எனக்குத் தெரிந்த ஒரு பள்ளியில் பள்ளிக்கே வராத பத்து குழந்தைகள் தொடர்ந்து பள்ளிக்கு வர ஆரம்பிக்கிறார்கள்.
 
அதில் ஒரு குழந்தை “கலைத் திருவிழா”வில் மாவட்ட அளவில் ஜொலிக்கிறான். இதன் விளைவுகள் முழுவதும் வெளிவர இன்னும் பதினைந்து ஆண்டுகளாகும்.
 
உங்களது தேர்தல் பிரச்சாரத்தில் ஒரு இடத்தில் “என் சகோதரிகள் இன்னும் ஒரு அரைமணி நேரம் கூடுதலாக ஓய்வெடுக்கட்டும் என்பதற்காகவும்தான் இந்தத் திட்டத்தைக் கொண்டு வந்தேன்” எ்ன்று கூறினீர்கள்.
 
இப்படியெல்லாம் சிந்திக்க எப்போதாவதுதான் உங்களைப்போல தலைவர்கள் கிடைப்பார்கள். இப்படி அபூர்வமாய் கிடைக்கும் தலைவர்களை நாங்கள் இதயமே இல்லாமல் தோற்கடிப்போம்.
ன்ன செய்வது, எங்களது நன்றி அப்படிப்பட்டது ஸ்டாலின் சார்.
 
உங்களது தோல்வி எனது இரண்டு எதிர்பார்ப்புகளில் மண்ணள்ளிப் போட்டிருக்கிறது ஸ்டாலின் சார்.
 
திங்கள் காலை ரவை உப்புமா கொடுத்தீர்கள். பிறகு அதை அரிசி பொங்கலாக மாற்றினீர்கள்.
 
செவ்வாயன்று சேமியா கிச்சடி, புதனன்று அரிசி பொங்கல், வியாழனன்று அரிசி உப்புமா, வெள்ளியன்று கோதுமை உப்புமா என்று கொடுத்தீர்கள்.
 
அரிசி உணவுகளை குழந்தைகள் கொட்டுகிறார்கள் என்று சொன்னார்கள்.
 
ஒரு குழு அமைத்து குழந்தைகளின் விருப்பமறிந்து அவர்களுக்குப் பிடித்த உணவைத் தரலாமே என்று 2025 செப்டம்பரில் எழுதினேன். அந்த மாதம் நடந்த எனது மகளது திருமணத்திற்கு வந்திருந்த அமைச்சர் மகேஷ் பொய்யாமொழி சார் அந்தப் பதிவு குறித்து என்னோடு பேசினார்.
 
அக்டோபர் மாதம் ஒவ்வொரு மாவட்டத்தில் இருந்தும் இருபது பள்ளிகளைத் தேர்ந்தெடுத்து குழுவினரை அனுப்புகிறீர்கள். அவர்கள் தினமும் காலை பள்ளிக்கு வந்து குழந்தைகளின் உணவு விருப்பத்தைக் கேட்டறிந்து போனார்கள்.
 
பிள்ளைகள், பூரி, இட்லியெல்லாம் கேட்டிருக்கிறார்கள். கிடைக்கும் என்று ஆசையாக இருந்தேன்.
 
ஏழை குழந்தைகளின் இட்லி கனவை உங்களது தோல்வி மறுதலித்திருக்கிறது சார்.
 
இந்த ஜூன் முதல் இந்தத் திட்டம் நடுநிலைப் பள்ளிகள் வரைக்கும் விரிவு படுத்தப்படும் என்று கூறினீர்கள். என்ன ஆகுமென்று தெரியவில்லை.
எனக்கு வயது 63 ஆகிறது சார். எனக்கு விவரம் தெரிந்து ஏழு முதல்வர்களைப் பார்த்திருக்கிறேன். பெருந்தலைவர், அண்ணா இவர்கள் ஆண்ட காலத்தில் நான் இருந்தேன் என்றாலும் விவரம் தெரியாது.
 
நான் பார்த்தவரை உங்களை மாதிரி ஒரு முதல்வரை நான் பார்த்ததில்லை ஸ்டாலின் சார். ”கலைஞர் +”  நீங்கள்.
 
இன்னுமொரு முறையேனும் உங்களது ஆட்சியைப் பார்த்துவிட்டுப் போக வேண்டும் என்று ஆசையாக இருக்கிறது சார்.
 
மத சார்பின்மைக்கு ஆதரவான களத்தில், சமூகநீதிக்கான போராட்ட களத்தில் எப்போதும் உங்களோடு இணைந்திருப்போம்.
 
மிக்க நன்றிங்க ஸ்டாலின் சார்.
 
அன்புடன்,
இரா.எட்வின்.    

இடது வழியும் இருக்கிறது ஸ்டாலின் சார்

  அன்பின் ஸ்டாலின் சார்,

வணக்கம்

நீங்கள் முதல்வராகப் பொறுப்பேற்ற கொஞ்ச காலத்தில்

“ஸ்டாலின் கலைஞர் ப்ளஸ்” என்று எழுதினேன்

அதைப் படித்ததும்

எங்கள் கட்சித் தோழர்கள் என்னவோ ஒரு புன்னகையோடு என்னைக் கடந்து போய்விட்டார்கள்

ஆனால் திமுகவில் உயர்ந்த இடத்தில் இருப்பவர்கள் உள்ளிட்டு பலர் என்னைக் கடிந்துகொள்ளவே செய்தார்கள்

வேறொன்றுமில்லை,

திமுக தோழர்கள் கலைஞருக்கு சமமாக உங்களைக்கூட பார்க்க மாட்டார்கள்

கலைஞர்மீது அவர்களுக்குரிய அன்பு அப்படி

ஆனால் அப்படி எழுதியது சரிதான் என்பதை இன்று (09.07.2025) திருச்சி ஜமால் முகமது கல்லூரியில் நீங்கள் நிகழ்த்திய உரை உறுதி செயகிறது

கலைஞர் இருந்திருந்தால் உங்களை அழைத்து முத்தமிட்டிருப்பார்

”காந்தி வழி, அம்பேத்கர் வழி, பெரியார் வழி என நமக்கான வழிகள் உள்ளன. மாணவர்கள் ஒருபோதும் கோட்சே கூட்டத்தின் வழியில் சென்றுவிடக்கூடாது”

என்று அழுத்தி சொல்லியுள்ளீர்கள்

திமுக மாதிரியான ஒரு கட்சியின் தலைவரால் இப்படி பேசிவிட முடியும்

ஆனால் திமுக அரசின் தலைவரால் இப்படி பேசிவிட முடியாது. இழப்புகளை சந்திக்க நேரும் என்பதை அறிந்தவன் நான்.

வெளிப்படியாகவே சொல்லிவிடுகிறேன்

இதுவரை இவ்வளவு வெளிப்படையாக யாரும் பேசியது இல்லை

இழப்பதற்கு பயப்படாத குணம் வேண்டும் இப்படி பேசுவதற்கு

உங்களுக்கு அது இருக்கிறது

முத்தம் சார்

பாருங்களேன் கோட்சே ஒரு கொலைகாரன்

அவன் RSS காரன்

இதை வெளிப்படியகப் பேசுவதற்கு நமக்கு ஒரு தயக்கம் இருக்கிறது பாருங்கள்

அதை உடைத்திருக்கிறீர்கள்

மீண்டுமொருமுறை உங்களை இறுக அணைத்துக் கொள்கிறேன் சார்

ஆனால் இது கோட்சே என்ற ஒரு மனிதனின் செயல் என்ற அளவில் அவனைக் குற்றப்படுத்துவதோடு சுருங்கிப்போய்விடக் கூடாது.

அவனுக்குப் பின்னால் இருந்த

இப்போது அமித்ஷா தொடங்கி

அய்யா H.ராஜா வரை கைவைத்திருக்கும் சித்தாந்தம்தான் நமது பிரச்சினை

ஒன்று சொல்லவா

19.02.1948 அன்று தஞ்சை சன்னாநல்லூரில் ஒரு கூட்டம்

காந்தியாருக்கான இரங்கல் கூட்டம்

பெரியார் பேசுகிறார்

அந்தக் கூட்டத்தில் அப்போது இளைஞராக இருந்த கலைஞர் கலந்துகொண்டு பெரியாரை ஏதோ கேள்வி கேட்கிறார்

பெரியார் கலைஞருக்கு இப்படியாக பதில் சொல்கிறார்

காந்தியை துப்பாக்கி சுட்டது என்பதற்காக துப்பாக்கியை ஒடித்துவிடலாமா?

வேறு துப்பாக்கி வாங்க அவனுக்கு எவ்வளவு நேரம் ஆகும்?

சரி கொன்ற கோட்சேயை கொன்று போடலாமா?

ஆயிரம் கோட்சேக்களை அவர்கள் உருவாக்குவார்கள்

சரி RSS அமைப்பை அழித்துவிடலாமா?

வேறு பெயரோடு வந்துவிடுவான்

அவனது சித்தாந்தத்தோடு சண்டை போடவேண்டும் என்று பெரியார் பதில் சொல்லி இருக்கிறார்

கலைஞரின் மகன்

வலுவாக,,

இழப்புகளைக் கண்டு அஞ்சாமல் சண்டை போடுகிறீர்கள்

சாம்சங் பிரச்சினையில் உங்களுக்கு எதிர் நின்றோம்

எங்களுக்குத் தெரியும்

எங்களைத் தவிர சங்கிகள் உள்ளிட்டு அனைவரும் உங்களோடு நின்றார்கள்

அது பாட்டளி மக்களின் உரிமைக்கான பிரச்சினை

அந்த விஷயத்தில் உங்களுக்கு எதிர் தளத்தில் நின்று உங்களோடு சமர் புரிவது எங்கள் வேலை

செய்தோம்

இனியும் செய்வோம்

உங்களுக்கும் அது தெரியும்

இதோ மோடிக்கு எங்கள் பலத்தை

இன்றைய பொது வேலைநிறுத்தத்தின் மூலம் காட்டி இருக்கிறோம்

இதுவும் எங்கள் வேலை

அதே வேளை இதுமட்டும் அல்ல எங்கள் வேலை என்பதும் எங்களுக்குத் தெரியும்

சங்கிகளுக்கு எதிராக உங்களை இணைத்துக்கொண்டு களமேகுவதும்

சங்கிளோடு நீங்கள் சண்டை போடும்போது உங்களோடு இணைந்து நிற்க வேண்டியதும் எங்கள் வேலை

செய்வோம்

நன்றி சார்

அன்புடன்,

இரா.எட்வின்

09.07.2025

#கடிதம்2025edn

#கடிதம்edn

இவை போதாதே ஸ்டாலின் சார்

  அன்பின் ஸ்டாலின் சார்,

வணக்கம்

திருப்புவனம் அஜித்தின் அம்மாவோடும் தம்பியோடும் நீங்கள் உரையாடிய காணொலியை சற்றுமுன்புதான் பார்த்தேன்

உங்களை வைத்து பார்க்கும்போது இது கொஞ்சம் தாமதம்தான் சார்

ஆனால் இது புதிது

எடப்பாடி இன்றுவரை சாத்தான்குளம் நிகழ்விற்காக இப்படி இல்லை என்றாலும் இதில் ஒரு துரும்பளவும் செய்ததில்லை

உங்கள்மீது நாங்கள் வருத்தப்படுவதற்கும் அவ்வப்போது கோபப்படுவதற்கும் உங்களது இந்தத் தன்மைதான் காரணம்

மீண்டும் என் நன்றி சார்

பிள்ளையை இழந்து தவிக்கும் அந்தத் தாய்க்கு எவ்வளவு பெரிய ஆறுதல் என்பதை என்னால் உணர்ந்துகொள்ள முடிகிறது

அஜித்தின் தம்பிக்கு நீங்கள் ஒப்புக்கொண்டபடி அரசுப்பணியை விரைவில் வழங்குவீர்கள் என்பதும் எனக்குத் தெரியும்

அது அந்தக் குடும்பத்தை எவ்வளவு ஆற்றுப்படுத்தும் என்பதும் எனக்குத் தெரியும்

ஆனால், இவை போதாதே சார்

உங்கள் ஆட்சியிலும் இதுவரை 24 பேர் விசாரனையில் கொலை செய்யப்பட்டிருக்கிறார்கள்

காவலர்களுக்கு அஜித் மீதோ மற்ற 23 பேருக்கோ எந்தப் பஞ்சாயத்தும் இல்லை என்பது உங்களுக்குத் தெரியும்

எனில்,

வேறு யாரோ இருக்கிறார்கள்

அது யாரென்பதை கண்டுபிடியுங்கள்

பின்னால் இருப்பவர்கள் உங்கள் முகாம்காரர்களாகவே இருப்பினும் தண்டியுங்கள்

மக்கள் உங்களோடிருப்பார்கள்

நன்றிங்க சார்

அன்புடன்,

இரா.எட்வின்

இரவு 10.57

01.07.2025

அவர் பெயிலென்றே கொள்வோம்

 இந்த கட்டிங்கை வைத்து தோழர் M S Rajagopal கொதித்திருந்தார்

10 ஆம் வகுப்பு பொதுத்தேர்வு எழுதிய முதல் பேச் மாணவன் நான்

1978 இல் எழுதினேன்

+2 விலும் முதல் பேச்  நான்

இது 1980

என்னைவிட குறைந்தபட்சம் 10 வயதேனும் மூத்தவர் ஸ்டாலின் சார்

எனவே அவர் 10 ஆம் வகுப்பு படித்தபோது பொதுத்தேர்வு என்பது 11 ஆம் வகுப்பில்தான்

11 + 1 +3 என்பது அன்றைய வடிவம்

அவரது 10 ஆம் வகுப்பு மதிப்பெண் அவரே நினைத்தாலும் வாங்குவது கடினம்

தமிழ் - 22ஆ

ஆங்கிலம் 18

கணக்கு 33

அறிவியல் வரலாறு 39

என்று ஒரு மதிப்பெண் பட்டியலை வைத்திருக்கிறார்கள்

ஏதோவொரு பத்திரிக்கை கட்டிங்தான் அது

அது என்ன அறிவியல் வரலாறு 39 என்று தெரியவில்லை

சரி

அறிவியலில் 39

வரலாறு 39 என்று கொள்வோம்

அந்தக் காலத்தில்

வரலாறு பூகோளம்தான் வரலாறு இல்லை

அப்போது elective என்று ஒரு விருப்பப் பாடம் இருக்கும்

அது எங்கு போனது என்று தெரியவில்லை

அது சரி

ஆமாம், அவர் பெயிலென்றே கொள்வோம்

அதற்கென்ன?

அவர் செய்த மாபெரும் பிழைகளுள் ஒன்று சாம்சங் விசயம்

அவரை விமர்சிப்பது என்றால் சாம்சங் பிரச்சினையில் ஸ்டாலின் நிலை குறித்து விமர்சித்திருக்கவேண்டும்

12 மணிநேர வேலைத் திட்டத்தை அவர் கொண்டுவர முனைந்தபோது அதை விமர்சித்திருக்க வேண்டும்

நேற்று கூட நடுக்காவிரி காவல் நிலையம் முன்பு இரண்டு பெண்கள் நஞ்சருந்தி அதில் ஒருவர் இறந்திருக்கிறார்

காவல்துறையின் அவலம் குறித்து விமர்சிக்கலாம்

போங்கப்பா 

ஏதாவது குட்டிச்சுவர் கிடைத்தால்

முதுகை சொரிந்து கொள்ளுங்கள்

10.04 2025

பார்த்ததில் இருந்து கிடந்து பிசையுது

 

இந்தப் படத்தைப் பார்த்ததில் இருந்து கிடந்து பிசையுது

டில்லி பாபு

10 ஆண்டுகளாக சட்டமன்ற உறுப்பினராக இருந்தவர்

கண்ணியமான அரசியல்வாதி

இதை போராட்டமாகக்கூட கொள்ள முடியாது

திண்டிவனத்தில் இருந்து ஆந்திரா நகரி வரைக்குமான மற்றும் NH 205 தேசிய நெடுன்சாலைத் திட்டத்திற்குமாக நிலம் கொடுத்த திருவள்ளூர் மாவட்ட மக்களுக்கு இதுவரை உரிய இழப்பீடு கிடைக்கவில்லை

அதற்காக தமிழ்நாடு விவசாயிகள் சங்கமும், CPM கட்சியும் போராடிக்கொண்டிருக்கின்றன

அதன் ஒரு பகுதியாக 26.03.2025 அன்று திருவள்ளூர் மாவட்ட ஆட்சித் தலைவரிடம் மனு கொடுக்கப் போனபோதுதான்

தோழர் டில்லி பாபு இப்படி நடத்தப்பட்டிருக்கிறார்

திருவள்ளூர் நகர காவல் ஆய்வாளர் திரு அந்தோணி கெட்டவார்த்தைகளால் வைதபடியே டில்லி பாபுவை இழுத்து போய் கைது செய்திருக்கிறார்

மாவட்ட ஆட்சித் தலைவரைப் பார்த்து மனு கொடுப்பது என்பது அவ்வளவு மோசமான செயலாகிப் போனதா என்பதை ஸ்டாலின் சார் விளக்க வேண்டும் 

பாலியல் வழக்கு

காவல்துறை விசாரனைக்கு அழைக்கிறது

“முடியாது இப்ப என்ன பன்னுவ” என்று ஆணவத்தோடு பேச, கூடியிருந்தவர்கள் குதூகலித்துக் கொண்டாடியதை வேடிக்கைப் பார்க்கிறது தமிழ்நாடு காவல்துறை

 ஒரு வழியாக விசாரனைக்கு வருகிறார். கோஷத்தோடு அவரை வரவேற்க ஒரு கூட்டமே காவல்நிலையம் முன்பு திரள்கிறது

சேனல்களுக்கு பேட்டி கொடுக்கிறார்கள்

காவலர்கள் வேடிக்கை பார்க்கிறார்கள்

நியாயமா ஸ்டாலின் சார் 

சட்டமும் ஒழங்கும்...

 தோழர் Angulekshmi E  அவர்களின் தம்பி மற்றும் பேரனை சமூக விரோதிகள் திருப்பூரில் வெட்டிவிட்டு தப்பியோடி இருக்கிறார்கள்.

இருவரும் விரைந்து குணமடைய வேண்டும்

சட்டம் ஒழுங்கு சொல்லிக் கொள்கிற மாதிரி இல்லை என்பதை முதல்வர் அவசியம் உணரவேண்டும்

24.03.2025

தாய்மொழியில் பெயர்ப் பலகை

22.03.2025 அன்று சென்னையில் நடைபெற்ற தொகுதி மறுசீரமைப்பு எதிர்ப்பு கூட்டுக்குழுக் கூட்டத்தில்

கலந்துகொண்ட தலைவர்களின் பெயர்ப் பலகைகள் அவர்களது தாய்மொழியிலும் ஆங்கிலத்திலும் வைக்கப்பட்டிருந்தன

சிறப்பு ஸ்டாலின் சார்

இன்று நடந்தது மிகவும் சரியானது

 நேற்று உங்கள் P.S தோழர் கலந்துகொண்ட போராட்டத்தில் காவலர்கள் அவ்வளவு அநாகரிகமாக நடந்துகொண்டதைப் பார்த்த பிறகுமா மாப்ள

இன்றைக்கு நடந்த தொகுதி மறு விரைக்கான எதிர்ப்புக் கூட்டுக்குழுக் கூட்டத்திற்காக முதல்வரைப் பாராட்ட முடிகிறது உன்னால்?

நிச்சயமா,

நேற்று நடந்தது தவறு

தவறென்கிறோம்

இன்று நடந்தது மிகவும் சரியாது

ஸ்டாலின் சாரைத் தவிர யாராலும் முன்னெடுக்க முடியாதது

இதை கொண்டாட்டத்தோடு பாராட்ட வேண்டும்

பாராட்டுவோம்

22.03.2025

நல்லது செய்ய வேண்டும்

 அன்பிற்குரிய முதல்வர் அவர்களே,

தகுதி மறு வரையறையில் தமிழ்நாடு உள்ளிட்ட சில மாநிலங்களுக்கு பாதிப்பு ஏற்படுவதைத் தடுப்பதற்காக நீங்கள் இன்று ஏற்பாடு செய்திருக்கக் கூடிய கூட்டமைப்புக் கூட்டம் நியாயமானது

வெற்றிபெற வாழ்த்துகிறோம்

மாவட்டத் தலைநகரங்களில்  நாளை நடைபெற உள்ள ஜேக்டோ - ஜியோ கூட்டமைப்பின் சார்பில் பெருந்திரள் பட்டினிப் போராட்டமும் நியாயமானது என்பதை நீங்கள் நன்கு உணர்ந்தவர் 

எனவே, நாளை நடக்கும் பட்டினிப் போராட்டத்தின் நியாயத்தை உணர்ந்து நீங்கள்  அணுக வேண்டும் என்றும்

தலைவர்களை அழைத்துப் பேசி நல்லது செய்ய  வேண்டும் என்றும் கேட்டுக் கொள்கிறேன்

22.03.2025

அனைத்து சங்கப் பிரதிநிதிகளையும் அழைத்துப் பேசுங்கள்

 28.12.2023 அன்று ”ஜேக்டோ ஜியோ” அமைப்பினர் தஙகளது கோரிக்கைகளை வலியுறித்தி முற்றுகைப் போராட்டம் நடத்தி கைதாகி விடுவிக்கப் பட்டிருக்கிறார்கள்

உரிய முறையில் ஆசிரியர்கள் அரசு ஊழியர்களின் போராட்டத்தை அரசு எதிர்கொள்ளவில்லை

கிட்டத்தட்ட 60 கும் மேற்பட்ட சங்கங்கள் ஒன்றுபட்டு போராடும்போது அதை தலைமைச் செயலர் மூலமாக அணுகுவதும்

மூன்றே மூன்று பேர் வாருங்கள் பேசலாம் என்பதும்

Unbecoming of Stalin sir

நாம் இதுவரை பார்த்த ஸ்டாலின் சாராக இந்த அணுகுமுறையில் அவரைக் கொள்ள இயலவில்லை

நியாயமாக,

அன்போடு ,

அனைத்து சங்கப் பிரதிநிதிகளையும் அழைத்துப் பேசுங்கள் என்பது அரசிற்கும்

என்னப் பிரச்சினை என்பதைப் புரிந்துகொண்டு அரசை வழி நடத்துங்கள் என்பது எதிர்க்கட்சிகளுக்குமான நமது கோரிக்கை

ஸ்டாலினிடம் இங்கிதத்தைக் கற்க வேண்டும்

முற்றாக விடைபெற்றிருக்கிறார் திரு விஜயகாந்த்

ஒரு குறையுமற்று மிக நிறைவான

மிகவும் மரியாதைக்குரிய வழியனுப்பிற்கு ஏற்பாடு செய்திருக்கிறது அரசு

ஸ்டாலினிடம் இங்கிதத்தைக் கற்க வேண்டும்

என்ற தோழர் Yamuna Rajendran அவர்களின் கருத்தை நான் ஏற்கிறேன்

தேர்தலின்போது குஜராத் செல்லுங்கள்

 அன்பின் முதல்வருக்கு,

வணக்கம்

எக்ஸ்-ரே விலிருந்து

அறுவைக் கூடம் வரை ஒரே இடத்தில்

நம்பவே நம்ப முடியவில்லை என்றும்

வானளவு உயர்ந்து நிற்கிறது தமிழ்நாடு மருத்துவத் துறை என்றும்

வியப்பின் உச்சியில் மயக்கம் போடாத குறையாக வாயைப் பிளக்கிறது குஜராத்தில் இருந்து வந்துள்ள மருத்துவர் குழு

பிரதமர் மாநிலம் மாநிலமாக சென்று தமிழ்நாடு குறித்து கேவலமாகப் பேசிக் கொண்டிருக்கிறார் பிரதமர்

பிரியத்திற்குரிய முதல்வர் அவர்களே

தேர்தலின்போது குஜராத் செல்லுங்கள்

குழந்தைகளுக்கான காலை உணவு

மகளிருக்கு கட்டணமில்லா பேருந்து

குடும்பத் தலைவிகளுக்கான உரிமைத் தொகை

நமது மருத்துவக் கட்டமைப்பு

கல்விக் கட்டமைப்பு

இந்து அறநிலையத்துறை செயல்பாடு

இங்குள்ள அன்பின் ஈரம்

அனைத்தையும் எடுத்து வையுங்கள்

பிரசுரங்களை கொண்டு செல்லுங்கள்

குஜராத் முதலாளிகள் வளர்ந்து கொண்டே இருக்க மக்கள் தேய்வதை எடுத்துச் சொல்லுங்கள்

அதற்கு காரணமான பாஜகவை அம்பலப் படுத்துங்கள்

விடக்கூடாது ஸ்டாலின் சார்

நன்றி

அன்புடன்,

இரா.எட்வின்

09.10.2023

#கடிதம்edn

நான் உள்ளிட்ட தமிழ் மக்களின் நேயர் விருப்பம்

 “எங்கு சென்றாலும் தமிழ்நாட்டை மறக்க முடியாதவராகவே பிரதமர் இருக்கிறார்”

என்று அவருக்கே உரிய தொனியில் நக்கல் செய்திருக்கிறார் முதல்வர்

நக்கல்தான் என்றாலும் அதற்குள் குழைந்து கிடக்கும் கோவத்தின் வெப்பத்தை தமிழ் மக்கள் உணர்ந்தவர்களாகவே இருக்கிறார்கள்

இன்னும் சரியாக சொல்வதெனில்,

அவரது கோவம் குழைந்த பகடிக்கு நான் உள்ளிட்ட தமிழர்கள் ரசிகர்களாக மாறிக் கொண்டிருக்கிறோம்

அவர் 

இன்னும் உக்கிரமாக

இன்னும் பேரதிக நக்கலைக் குழைத்து

பிரதமரை எதிர்கொள்ள வேண்டும் என்பது

நான் உள்ளிட்ட தமிழ் மக்களின் நேயர் விருப்பம் 

தமிழ் மண்ணில் உள்ள “இந்து அறநிலையத் துறை” குறித்து ஏதும் அறியாதவராக

கிட்டத்தட்ட அண்ணாமலைக்கும் திரு H.ராஜா அளவிற்கும் இறங்கி பிரதமர் பேசுவது

அவர் நமக்கும் பிரதமர் என்பதால் கொஞ்சம் வலியைக் கொடுக்கிறது

அசிங்கமாக இருக்கிறது

தெற்குப் பகுதியில் மக்கள் அசிங்கமாகத்தான் இதைப் பார்ப்பார்கள் என்பது அவருக்கும் தெரியும்

பிறகு ஏன் அசிங்கப்படுகிறோம் என்று தெரிந்தும் இப்படி பேசுகிறார்?

இது வடக்கிற்கான அவரது பிரச்சார யுக்தி

தெற்கில் இது பொய் என்று புலப்படுவது மாதிரி வடக்கில் புலப்படாது என்பது அவருக்குத் தெரியும்

கோவிலை திமுக ஆட்டையப் போடுகிறது என்று சொன்னால் தெற்கில் சிரிப்பார்கள்

அடப் போயா என்று நக்கலிப்பார்கள்

ஆனால் வடக்கில் அப்படியா என்று வியப்பார்கள்

அப்படியாகவே அவர்களை படாத பாடுபட்டு பாதுகாத்து வருகிறார்கள்

அவர்களிடம்

எங்களை விட்டால் உங்கள் கோவிலுக்கு பாதுகாப்பில்லை என்கிறார்

ஆகவே எங்களைத்தான் நீங்கள் தேர்ந்தெடுக்க வேண்டும் என்கிறார்

இந்தியாவை வெற்றி கொள்ளாமல் மாநிலத்தை மட்டும் வென்றால் அவர்கள் 

ரவியை அனுப்புவார்கள்

தமிழிசையை அனுப்புவார்கள்

பெரியாரை

அம்பேத்காரை

வைகுந்தரை

நாராயண குருவை 

அவர்களுடைய பாஷையில் அவர்களிடம் கொண்டுபோக வேண்டும்